Ćakula z Borison Juretićen - Carićen
počasnen članon Halubajskeh zvončari
Napisala: Tatjana Udović Šaftičina
Izvor: Glasnik Općine Viškovo
Boris Juretić - Carić z četira leta je prišal z Martinovega Sela bivat Srokon i zajeno kot mići je poče! za zvončari pohajat. Pratil jih je po njihovoj rute, a 1960. je, kot mladić od sedamnajst let, i on sam krenul va zvončari. Va svojen zvončarsken staže je bil se osin vraga, a bil je i precjednik Društva halubajskeh zvončari. Va zvončarsku penziju je šal 1990. kad mu je sin počel zvonci nosit, aš reče da je dosta da jedan z kuće bude zvončar.
Va oven kraje su bile dve grupe zvončari: Marčejski zvončari i Zvončari od Kosi.
Kada ste krenul va zvončari i kako j'to onda bilo?
Kako otrok san već hodil gjedat zvončari i pohajat za njimi. A va zvončari san krenul 1960. leta, od 17 let. Onda je rabilo starega komandanta poć pitat ako će te prijet. Najprvo je saki, kad bi bil primjen va zvončari, moral jaja pobirat, pak san tako i ja. Va ono vreme, onemu ki bi prvi put zvonci oprtil, stari zvončari nisu teli pokazat kako se zvonac veže. To si moral se sam navadit i odgonetnut kako zavezat zvonac, a da te ne žuli. Ona leta kada san bil va vojske, nisan bil zvončar, a se drugo san do 1990. leta. Va svojen zvončarsken staže san bil se osin vraga; jaja san pobiral dva leta, banderu san nosil, medveda pejal tri leta, medved san bil dva leta, komandant san bil četira leta, Pusta san nosil, a najveć san bil zvončar. Jeno 9 let san bil precjednik Društva.
Kako je 1960. zvončar bil obučen i kako je prišlo do tega da je današnji zvončar obučen ovako kako je?
Prvo smo imeli škure brageše, stomanju na kvadri, visoki postoli i vunene kopice. Maškaru sej'storilo tako da se j'preklopilo kožu od blaga - od ovce, koze, divega prasca, al kunelića, storilo se j' škuje za oče, črjeni nos i to se je zašilo za kalup od kartona, al na škatulu. Zvonac je saki delal za se. Rabilo je nać pravi materijal ki dobro zvoni. A pravi zvonac se ne vari, nego ga se tuče. Nabija ga se z batićen aš, kad se metal vari, zgubi zvuk. Mačuku se j'storilo od dreva, oblikujuć ga. Mi zvončari smo najprvo z svojga žepa davali soldi za platit muzikanti ki su šli okolo s nami. Zato smo kašneje pobirali jaja, da ih moremo potla prodat (po kućah se j' prodavalo i sakako) i s temi soldi platit muzikanti i večeru. S nami su bili armunika i bubanj. 1967. smo storili statut i registrirali se kot Društvo halubajskeh zvončari. Ja san onda bil precjednik, a imeli smo blagajnika, tajnika i nadzorni odbor. Odlučili smo mjesnemi zajednicami od mesti po keh smo hodili poslat molbi da nan pomoru financijski. Tako su nan pomogli: Kastav, Viškovo, Marinići, Škurinja, Pehin i Gornji Zamet. Kako smo dobili ki solad, nabavili smo bele brageše, nesli va jenu krojačku radnju v Reku da nan zašiju črjenu rigu, šli smo va Sloveniju nabavit kože.
Prva gostovanja?
1971. leta smo prvi put šli van ondašnje Jugoslavije. Va suradnje z Turističkun zajednicun Opatija smo šli va Taliju, va Fano na karneval, na četiri dani. Bilo nas je četrdesetak zvončari. Bilo j' lepo i judi su nas jako lepo prihvatili. Onda smo počeli hodit va Sloveniju, va Ptuj, pak va Samobor, 1967. na Smotru folklora va Zagreb - onda smo već bili va beleh bragešah. Šlo se je još va Poreč, na Vinkovačke jeseni, pak smo bili 1974. va Beograde na utakmice Finale kupa Jugoslavije Rijeka - Hajduk, na Olimpijade va Sarajeve. Vavek su nas lepo primali.
Kako se j' nekada odrejevalo ki more nosit zvonci?
Nekada ni bilo čuda zvončari. Jeno leto nas je za Pust bilo samo sedan. Kašneje se j' broj sako leto povećeval; sledeće leto nas je bilo četrnajst, pa dvajset i jedan, dvajset i osan, trejset i dva, pa četrdeset. Prvo ni bilo Statuta pak ni bilo odrejeno da zvoncar mora bit samo čovek z Halubja. Tako je zvončar bil i neki z Zameta. Ali sejeno je Odbor gjedal i odlučeval ki more poć, ni se sakega zimalo. Jedanput me j' doma jedan mladić od Petre z ocon čekal ure i ure dok se nisan z dela vrnul, da me pita ako bi mogal zvonci nosit. Kada san mu rekal da more poć s nami, vas je vesel doma tekal. Vavek sej'vodil spisak i po njin su prednost za na gostovanja poć, kadej'rabil odrejeni broj judi, imeli zvočari ki smiron okole hode. Saki ki je krenul va zvončari, moral je pasat za jajara. Za zastavu nosit se j'vavek neki našal. A ča se tiče komandanti, bilo je komandanti ki nikad nisu zvonci nosili.
Zvončarska večera?
Nekada ni bila kako je sad večera za zvončari. Užali smo se skupit v oštarije pu Bačurkineh pu Marčeji i onda su nan pripravili supice.To je bila večera! Komać kašneje se j'počelo te veće večere delat.
Ruta?
Ruta j' 1960. leta bila jednaka kot je i sad. Jedino smo prvo još hodili utorak Rubešan. Šlo se je na Bačići, Rubeši, Belići pak va Kastav gore. Rubešan se j' prestalo poć, a onda smo prehitili da se va Kastav ne gre utorak nego pundejak, aš bimo drugačje va Viškovo na paljenje Pusta prišli jako kasno. Tako se j'odlučilo da će se utorak poć od Bezjaki, na Milohni, pa va Viškovo kade bimo onda imeli više vremena. A Pust se ni odvavek važigal na Brege va Viškove. Prvo smo ga znali važgat na Vožišćeh kade je bil obešen na orehe. Ča se ja zmišjan, oko 1960. leta smo Pusta znali važgat sredu. Par let je bila regula da sredu komandanti naprte zvonci i jedino oni malo zvone, a onda bi se Pusta važgalo. To je malo duralo. Kako je po srede bila vela fešta pu Rubeš, smo odlučili utorak palit Pusta.
Štacije po seleh?
Zvončari su se vavek hodeć po svojoj rute fermevali po seleh kade bi njin se parićalo vina i ča za pojist: najčešće kapuz i kobasice. Užanca je bila da zvončari va saken sele zatancaju z ženskami ke su jih prihajale gjedat. Prvi tanac je bil za one ke su njin parićevale jist.
Zanimljive užance od nekada?
Užanca je bila da se onemu ki Pusta nosi, ukrade Pust i skrije! Onda bi taj moral sakuda potekovat i Pusta iskat. Prvo su zvončari va jenoj ruke nosili bačuku, a va drugoj najlonku vakoj je bil popel. Onda bi popel hitali na ženske i pod brhani njin i sakako. Kašneje se j'to zabranilo, aš sej' s ten popelon judi jako oblatilo.
Ča znači bit zvončar?
čovek mora bit pun jubavi za stari običaji, pun forci za zabavu i druženje, z velen srcen za naš kraj!
Vrag i medved?
Vrag i medved su odvavek bili slobodneji od zvončari, nisu pod komandun.Vrag je vavek potekoval okole, lovi! i črnil ženske. A medved je pak kumedijal, hital se žensken pod nogi. Prvo j' bilo teško nać onega ki će bit medved, aš je za medveda storit, rabilo puno kože, a to j' bilo skupo.
Jajar?
Bit jajar je zapravo jako teško, ako će se po praven pobirat. Aš oni ki jaja pobiraju, bi po praven trebali vavek bit dva sela napred od zvončari i rabilo bi saku kuću obać, tako da judi daju jaja i onda gredu gjedat zvončari.
Komandant?
Komandant vavek mora pazit na red, kako se hodi, a isto tako kako se ponaša. Znalo se j' dogodit da se zvončar napije pak, ako sam ni otel poć doma, mu se j' špagi prerezalo. Ako j' pak ki ča većega storil, kakovu škodu, bi mu se na više let zabranilo da nosi zvonci.
Zaključak:
Jako j' lepo bit zvončar! Najprvo zato ča znaš da držiš do užanci, a onda i radi kumpanije. Ma samo ako čovek more. Nas je nekoliko reklo da kad pasamo pedesetu, ćemo prestat. I smo. Moj sin je krenul va zvončari 1990., a ja san šal va zvončarsku penziju. Rečen da je dosta da jedan z kući nosi zvonci.
